أكيد مش رح أحكي عن إكتشاف غزازوة بالمريخ...و إنما اليوم اللي كانا كلنا نفسنا نكون فيه هناك !!
الحرب على غزة...الرصاص المسكوب...معركة الفرقان...مجزرة + مذبحة + مسلخة غزة....سموها اللي تسموها...النتيجة وحدة...اليوم هادا بالتحديد غير إشي جوا كل إنسان عاش التجربة...و نفس الإشي اللي بحكيه كمان...فش منتصرين بأي حرب...بس يمكن حد خسر أقل من التاني...فطز بالنتيجة !
الذكريات لسة موجودة كأنها كانت اليوم (شايفين الصدفة اليوم 27) بحاول ألاقي أشياء أضحك عليها مع كل اللي صار...

1- أول يوم لما صارت أول خبطة...كنت نازل على الشغل...أكم من صاروخ نزل هنا و هناك و أنا كنت بنص الشارع...يميني كان فيه المجلس التشريعي...و شمالي مركز أمني إسمو السرايا (التنين إنقصفوا في الحرب بس مش يومها)...مش هون الحبكة...يومها الكل كان متوتر و الكل ما كان عارف يفكر...بس مش لدرجة إنو واحد يجري بالشارع رافع إيديه زي الرسوم...و بصرخ بكامل قدرتوا الصوتية...حنموووت قصف عشوائي...يعني حتى لو كنت الإسرائيلي اللي بقصف حتتوتر...نفسي أشوف الشخص هادا مرة تانية!

2- قصة صارت شائعة بالعيلة و أصدقائي العزيزين لا يدخرون جهدا إنو ينشروها...فـ رح أحكيها و اللي يصير يصير...
هادا يا جماعة الخير...يوم من الأيام بتاعت القصف...كان القصف قريب من بيتنا...و محسوبكم...كان ماكل شباشب و عامل رامبو و ماسك حالوا عشان غيروا يتشجع...عاد من جوا كنت بالفشنكح....المهم...إجت خبطة جامدة و مختلفة شوي....و بعد أكم من دقيقة...إتصلوا فينا العيلة...و الناس بتعيط و بتعيط و حالة !!
س : (بلوعة من ولع و مش مصرف) حمدالله على سلامتكوا....بعيد الشر عنكوا...الكل بخير ؟
شريف : (بإستغراب الغرب) الله يسلمكم...الكل منيح....إيش فيه ؟
س: (بغضب و إندهاش القماش) إيش اللي إيش فيه عمارتكم إنقصفت...وانتا بتحكيلي إيش فيه ؟!
شريف : (بثقة كاملة) لا لا لو قصفوا العمارة كان حسيت...إطمئن...يمكن ورانا !؟
س : لا بالراديو بحكو برجكم !
شريف : بالراديو بحكوا إنتصرنا...عادي !
س: الله يحميكم...الله يحميكم!!

و أكيد كمان أكم من إتصال زي هيك من أرجاء الوطن الواسع المتسع و الخارجية...ونا كللي ثقة و يقين و عبير و نيفين إنو القصف بكل مكان و أي مكان إلا عنا...و هون بحب أحيي الDefense mechanisms تعون الإنسان عشان القصف كان فعلا بالعمارة تعتنا...شكراً...بس الحادثة هادي أعطتي الفرصة أتعرف على أشخاص جداد...مين الأهبل اللي بدو ينسى الطبل اللي إنقصفت عمارتو و تاني يوم عرف...و هو فيها !!

3- أيام الحرب كانوا يتصلوا فينا من بلاد عربية تانية...يعني بشكل عشوائي...أحيانا مصريين و أحيانا من الجزائر...و غيروا عشان يقدموا واجب التضامن...على فكرة...أنا لسة كنت شاكك فيهم يكونوا حد تاني...بس كان جميل الشعور إنو كنت أنكش راس عليهم (لغاية ما إتبهدلت من أبوي ) يرن واحد مصري على رقم من غزة...يرد عليه واحد من سوريا و بحكي غزاوي (أنا) أو أحيانا مخبز الكرامة...مصنع الشندغلي...راديو بيت لحم....الله لا يعيدها من أيام !

حكيت كتير...للناس اللي الله أعطاها الصبر و القوة إنو تكمل البوست هادا للآخر...بحكيلهم....الحمدلله على كلشي...الحرب اللي فاتت طلعنا منها...الحرب هادي يمكن لأ...و و بدل أجندة للسنة الجديدة...يمكن وصية...عادي...جد عادي !!