ياعيني يا عيني...هينا قاعدين بنشطب بال2009 السنة الإتبهدلنا فيها على كل مستوى ممكن يكون صار بالدنيا هادي....و هي عرض لأهم الأحداث اللي صارت :

على الصعيد السياسي:
الحرب على غزة : نقطة تحول بحياة كل إنسان عاش التجربة ؟!
بالظبط هيك...فيه ناس بحكوا إنو إنتصرنا بهادي الحرب؟
فيه ناس بحكو إنو لأ !
بس السؤال هو إذا إيش الفايدة إنو نسمي النتيجة بدون ما نتطلع عللي وصلنا لهادي النتيجة...حرب داخلية كانت البداية و النهاية حرب على غزة جابت أجل الأخضر و اليابس و الصرحة أنهكت كل البشر فيها، و غيرت نظرتي للعالم من كتير زواية، كيف ممكن الناس تستفيد من وجع غيرها، كيف ناس بتطلع و كيف ناس بتنزل، و كيف الناس ضاعت و كيف ناس قاومت و حاربت نفسها قبل أي إشي عشان تستمر و إتضل نضيفة بوقت بطلت عارف تحط معايير لأي إشي !!

على الصعيد الشخصوي (الشخصي):
الحمدلله السنة هادي كانت مشغولة بالشغل أو على  القليل الجزء ما بعد الحرب و الأغرب إنو لولا الحرب ما كان فيه شغل...بس هيك نظام الدنيا بقتل القتيل و بمشي بجنازتو...بعد ما خلصت الحرب على غزة  و قتلت و حرقت إجا العالم كلو يساعد و ينقذ ما يمكن إنقاذو...ما علينا...السنة هادي تعلمت كتير أشياء و الإشي الأقولا إنو جربت أنواع كتير من الناس...نوع كذاب و نوع نصاب و نوع منافق و نوع بتحترموا لفترة معينة و بعدين بتصحالو و غيروا و غيراتو....و فيه أنواع من الناس اللي كنت بتفكرها إنقرضت و لا يمكن مخفية و مش طالعلها صوت....يمكن عشان مش زمانها...و ناس بتتمنى تقضي اللي باقي بحياتك و انتا بتعرفها و بتتعامل معها.
اه و نسيت أحكيلكو أنو نزلت 20 كيلو و عاودت طلعتهم !

على الصعيد العاطفي :
شاب في ال26 يبحث عن أي حدا ، متعلم و سكان قلعة الكبش، يقدس الحياة الزوجية و الحياة الجديدة و الحياة البرية و البحرية و يجيد صناعة سندوتشات الجبنة بكافة أنواعها حسب طريقة إفتح الخبزة – صف الجبنة – سخن الخبزة – إحرق الخبزة – كب الخبزة !

على الصعيد الفني :
بستنى منتج شجاع يؤمن بالمواهب الشابة، الحمدلله تم إيقاف يوميات أبو الشريف لسوء أدائي فيها بس الجانب المشرق إنو بطل حد يتصل يحكيلي بعرضك تطلعش على التلفزيون !
اه و يا خسارة على مايكل جاكسون...ما كنت أحبوا لغاية ما مات...يمكن عشان بربطنا بطريقة معينة بفترة كنا عايشين فيها بهدوء و ذكريات محتملة منيحة...مش عارف أعرف أدري !

أغلب خططي فشلت...زي إنو حضرت مليون فلم بس ما قرأت إلا كتابين تلاتة...سجلت ب4 نوادي بس كنت أروح أول مرة و ما أوصل هناك مرة تانية...تعرفت على ناس كتير بس أغلبهم طلع بالفاشوش...و الفشل الأعظم إنو لساتني بغزة...

بس الإشي اللي بلغي كل إشي سيئ صار السنة هادي...إنو عرفت ليش أنا موجود...و إيش بدي بالدنيا هادي...
و هابي نيو يير يا جماعة...